Bahtallo Ramazano 2023 1444

Tahara 23.03.2023 anglluno dive e Ramazanesko.

Bahtallo Ramazano sarenenge ko shukipe (Som ja se Ramazano) adikarella thaj sah e muslimanyenge.

Soj Ramazano?

Ramazano sito o 9 masek e Hijra Kalendaresko ano Islami. Ano Islami si 12 masekja(chon). O dola siton: 1.Muharrem, 2.Safer, 3.Rebi-ul-evvel, 4.Rebi-ulahir, 5.Jumade-l-ula, 6.Jumade-l-uhra, 7.Rejeb, 8.Shaban, 9.Ramazan, 10.Shevval, 11. Zul-ka`de, 12.Zu-l-haj

Ramazano sito Bahtallo masek ano Islami. Ano a kava masek allo o phenibe (ajeti) e Kuranesko, ani Muberek rat Kadr. Ano masek e Ramazanosko o Bahtallo Devll denga obligaciya e muslimanjenge te adikaren shukipe(Som). Ano Bahtallo Kurano besto: 

,, O tumen pakavne! Situmen obligacija shukipe te adikaren, sakana so sinolen obligacija shukipe te adikaren o dolla so sineton angle tumen, vash te garaven korkore tumen kotar tumare duhoske thaj moraleske godjata.``

Ka adikaren gende dive, a ko tumenda nasvallo sito ja se po drom sito, mangllape(shay) te adikaroll javer dive (pallo Ramazano), thaj o dolla so shaj nay te adikaren, seske pharipe sijolen, mangellape te dan habe sar kompezaciya jeke coroleske (ji o Ramazano sito). Thay ko kerella llacipe pere phere kefeja, ka ovellolen but bahtalipe. Thaj shukipe te adikaren po llace vash tumenge sito, te sine so kan lena.

O masek e ramazanesko sito o dova so diktirisallo o Kurani, sito drom e sah manushenge e sah cacekipa thaj so ullavella o llacipe e chellalipasta. ko tumenda arakhella a kava masek, mangellape shukipe(arapski Som) te adikaroll. A o dova so nasvallo sito, ja se po drom sito, mangellape te adikaroll aboka dive so nay adikarga o dolla javer dive. O Allah mangella llokipe tumenge, a na pharipe. Ov mangella so tumen te pheren o gende dive thaj te bayaren e Allaho, seske Ov sikaga tumenge o düz drom thaj llacepenjarde te oven. (Al-bakara, 184-186)

Adikaren shukipe, thay kereni dovaja e Devleske. O Devll ano Kurani Phenella:

,, Thaj kana Mere butjarne(rrobja) pucna tute vash Mange, phen: Me sim pashe. Me dava jevapi o doleske so mange dovaya kerella. Pa ini on mangellape Mange te denpe thaj pa Mande te pakan, te sine so mangena te arakhen düz drom. `` (Al-Bakara, 187)

SAR ALLO VAHI (AJETI E KURANESKO)?

Hazreti Ajsha  e day e pakavnengi phenella:

,,Po angle avena sine e Devlesta vahi sar llace sunya so dikhella sine ano sovibe. O dolla sine sah shuzhe sunja sakana o parnipe e sabayesko. Posem ov kamla te ovoll korkoro ani shpella e Hira thaj ov o dote garavellape  thaj dovaja/Ibadeti kerella e (Devleske) sine so rat baro, angle te fulella sine koring piri familiya vash habe te loll vash a kale ciljeske. Posem inarellape sine koring e Hatijya sar po angle. Ayaka kerga ji allo o leske o CACEKIPE ji ov ani shpella Hira sineto.

Allo o leske o Meleko thaj phenga: ,, Ikre`` (Siklov, Gillav!)`` ,, Na janava te siklovav(gillavav)`` jevapi denga o Profeti s.a.v.s.). ,, Lelama, phenga ov(Muhammedi), thaj kedingama aboka ji so lelama pharipe, thaj posem muklama thah phenga: ,, Ikre`` (Siklov, Gillav)!`` - ,, Na janava te siklovav(gillavav) phengum, a ov (o Jibrilli) lelama thaj o duyto fora kedingama ji na lelama o pharipe, posem muklama thaj phenga: ,, Ikre, ...``  ,, Siklov ano nav tere Devlesko, so kerga sah sasave, kerga e manushe kotar o sapando/ lepimo ratesta. Siklov, , se toro Devll sito Baroduhosko``. Posem o profeti s.a.v.s. inargape, thaj tresiba khuga ki Hatija b Huveylidi r.a. thaj o llake phenga: ,, Ucharenma! Ucharenma!``. Uchardole ji na darasallo. Mothaga e Hatijake so ullo, thaj phenga: .. Darava1`` A e Hatija phenga: ,, Na, soh kerava po Devll, na-a nisar!`` O Allah tute na llajarella thay na mukella tute ni jek fora, seske tu vizita kereja tere pashen, phiko deya e yetimenge thaj o dolla so naneton po takati, deya e corolenge, sijan llacoamall o dolenca so olen ajukareja thaj phiko deya o dolenge so garavena o cacekipe``. Posem e Hatija ningarga ole koring poro kakosko chavro, Vereka b.Neufel b.Esed b.Abdi Uzza. A kava manush lello angali sine o Kristiyanengo Pakibe ano jahiliyetesko vakteste. Janella sine shuka te sikloll(gillavoll) thay te hraminoll hebrejengi chibyate, thaj hraminella sine e hebreyenga chibyate o Injilli o dova so o Allaho mangella sine ov te hraminoll. Sineto phuro/purano thaj perdo e takatesta , thay cacek korolillo sine. E Hatija phenga (e Verekaske): ,, O chavoro e mere kakosko, shun chigode so phenella tere phraleske chavoresta.`` Vereka phenga (e Muhamedeske): ,,O chavoro e mere phralesko, soy o dova so dikhlan?`` O Profeti s.a.v.s. mothaga o leske e Verekaske so ullo o leya, O Vereka phenga: .. O dova sito o Namusi, so o Allah bichallga ole e Musaske. Ah te ovollma sine baht te ovav terno ano divende kana kana ka mange te aven tuva. Ah te ovollma sine baht jivdo te ovav so kana toro them tute ka palldoll.`` ,, Pheneya ka palldenma`` Pucla (o Profeti s.a.v.s.). ,, Ja,-phenga ov, - seske nikana ni yek na anga ajar chigode sar tu, a so nane mardillo. Te ovav sine jivdo, dava sine tuke phiko kobar so shay te kerava sine..`` Na gello but vakti pallo a kaleste, Vereka mullo. Ini vahi (objava)  jek vakti achili. (Sahih Bukhari, gendo 3)

,,Ikre`` sito anglluno diktiribe/ajeti (vahi) so o Jibrilli anga e Bahtale Profeteske s.a.v.s. ani rat Kadr e Ramazanosko. Kadr manglla te phenoll:  Baripe, Shuzhipe, Dekreti, Baht, thaj Zoralipe/Takati.